لبلوڭ مخضر بالدارجة

An article by Robin Des Blogs    4 Comments

شحال هادي وانا باغي نبدا فهاد المشروع ديال الكتابة بالعربية، وخصوصا الدارجة، ماشي حيت ولات موضة ولا غير باش ندير مادارو لاخرين، ولكن حيت كاينين شي حوايج إيلا ما تڭالوش بلغة الشعب، ماكايبردوش الڭلب، تماما بحال المعيور. كلنا كانهضرو بالفرنسية ولا بالعرنسية النهار وما طال، ولكن منين كنقدشو الملاد الوحيد، واللغة الوحيدة اللي كانلقاو فيها راحتنا هي دارجتنا المحبوبة اللي المخارج ديالها سبحان الله بحال إيلا مديورين غير لمطايفا.

آيوا هادا راه غير مثل وريتو ليكوم، بلا ماتمشيو بعيد وترضونا عاوتاني كانحرضو على العنف، وارا ماعندك: دكتورهو العنيف، دكتورهو المتوحش، دكتورهو عضو القاعدة وزيد وزيد حتى لسيدي بوزيد على حد قول العلاّمة ادريس اللباط.

المهم، انا راني درت ليكوم هاد المقدمة بحال شي مملحة باش نفتح ليكوم الشهية للحوار، حيت انا ماناويش نبقا غير نقشب، واخا مافيها باس، المشروع ديالي هو فحد داتو ماشي شي سكوب ولكن الهدف منو هو التعليق على شي مواضيع و طرح شي اسئلة، و علاش لا ڭاع منحلمش بشي عمل ادبي بلغة المروك.

الإشكال الوحيد الي يمكن يجيب ليا التمام، و يخلي هاد الفكرة تدوز مرور الكرام، بحال شي مدونة ديال السويد، هوا نوعية المواضيع الي ممكن يناقشها المغربي المثقف من الثقافة ماشي من الثقاف الله ينجينا و ينجيكم من السبرديلا ديال نيسلون مانديللا ولا البرودكان ديال الجندي المجهول,بلغة الشارع . هاد التساؤل دار ليا الشقيقة و تحنسرت شحال وانا كانفكر كيفاش نرسم واحد الخط تحريري ملائم للدارجة و فنفس الوقت للافكار ديال دكتورهو، ولقيت راسي كنحسب حساب للمتلقي، حيت إلى كاينين شي ناس عندهوم بحال بحال، اللغة ديال الصياغة ماشي اهم من الفكرة فحد داتها، فالجهة المقابلة كاينين لي كيستعملو العامية غير للتقشاب و شدان القرنابي.

ما كاين باس، عند دكتورهو ماكايناش الفرزيات، وكيفما غادي، إن شاء الله ندويو فالمعقول، غادي نديرو شي بركة ديال القورورو، يعني سيد الهاضوري الضاحوكي. إوا كيجاكم روبان دي بلوڭ بالدارجة؟ زوين بزاف ياكو؟! بسم الله آسيدي نبداو المغامرة، ولي عندو شي إضافة مرحبا بيه، الدار كبيرة الحمد لله، خوكوم واخد ايبيرجومون دكالي، التيساع عطاه مولانا! اراكم للفراجا دابا، وخا الفراجا كونسيپط راجاوي، نديرو ليه إقتباس.
قبل مانسالي، بغيت نكوليكم، عافاكم إلى كان ممكن، التعليقات ديالكم اي لي كومونطير، ماكرهتش تاهوما يبقاو فإطار الادراجات، يعني بالدارجة المكتوبة بالاحرف العربية، ولي مافراسوش كيفاش يمكن يدير هاد العملية بسهولة، كاين واحد الخدمات فابور بحال يملي، نتا كتب و هوا غايطرجم.
آلي شافتكم الشوافة هاد الساعة.